venres, 17 de maio de 2013

Eixe

Timón que potencia, chavella que fixa, caderna que dirixe,  abeaca que delimita, rella que abre. Ferramenta principal que ara na gramática sementando fonemas nos regos, acugulando de sílabas os sucos, enchendo de palabras o agro, agromando con voces dulcísimas a bóveda do entendemento.
 Ti es bandeira, sinal e himno; eixe, razón e motivo. Es verbo, raíz, esencia mesma; xermolo do todo, lévedo absoluto; sal que matiza, azucre que suaviza, pimento que dá cor, herba do sabor.
Marco delimitado, soporte; liturxia íntegra de canto dicimos, manteliño de silencios, encaixe susurrado...
A través de ti, fala da ledicia, manifestamos arelas, expresamos soños e patentamos realidades. En ti, lingua galega, desembocan todos os ríos do pensamento magníficamente expresado.

 Foto: Eixe dunha bágoa duplicada. Aldea de Belesar.

14 comentarios:

Anónimo dixo...

Fermosamente definida e sentida. É nosa e somos nós.
Ese arado que non deixe de abrir sucos!!
Parabéns Sr. Chousa.Apreixos e bicos cheos de ledicia.

paideleo dixo...

No futuro seguro que che adicarán este día. Merécelo de verdade !.
Agora que faga un vídeo Zeltia e que cante este posteo Pitima.

Raposo dixo...

AMÉN!!!

pitima dixo...

Magníficamente expresado.

Harmonía dixo...

Acertado motivo.
Acertada imaxe.

Carlosm dixo...

Eixe marabilhosamente loubado nesta oracion tua. Gostei moito dese simil co arado e desfruto da marabilhosa image eixada. Saudos sempre em galego

Marisa dixo...

Esta nosa lingua
a lingua galega.

Moitos bicos

Anónimo dixo...

Hermoso tu sentido tributo a la lengua galega. Me ha encantado. Enhorabuena

peke dixo...

Guau! Fermoso.

A.C. dixo...

A foto linda linda Chousa, e coas tuas palabras pos emocion nos regos que ti aras as mil maravillas. Parabens e ,moitos bicos

Paz Zeltia dixo...

Pois, si... magníficamente expresado.

[paideleo ten moita retranca...!]

Magdalena Malungo dixo...

Outra de lingua galega para Chousa, por favor!

Chousa da Alcandra dixo...

Enlazando co comentario de Magdalena, que sexa outra de lingua galega para todos. Incluido o goberno da Xunta, que boa falta lle fai.
Graciñas por vir a esta Chousa (ben sei que ides tamén por outras, pero eu fago así coma quen que non o sei)

mariola dixo...

Fermosamente dito!
Quédome con" manteliño de silencios"
Da gusto poder expresar así de magnífico a nosa lingua. Orgullosa me sinto.
un bico chousa.